Twin Peaks-model : die nuwe regulatoriese raamwerk vir die Suid-Afrikaanse finansiële sektor

Abstract

Ná die finansiële krisis van 2007 en die impak daarvan op ekonomieë is regulatoriese raamwerke wêreldwyd heroorweeg. Die regulatoriese raamwerk van die Suid-Afrikaanse finansiële sektor is hervorm volgens die Twin Peaks-model. Dié model word as die geskikste benadering beskou vir effektiewe finansiële regulering en die bereik van behoeftes, soos sterk regulering van ’n komplekse en interafhanklike finansiële sisteem en finansiële stabiliteit. Die navorsingsvraag van hierdie studie is tot watter mate die implementering van die Twin Peaks-model, as regulatoriese raamwerk, moontlik tot ʼn meer stabiele Suid-Afrikaanse finansiële sektor kan bydra. Gevolglik is aspekte soos die ontstaan, samestelling en impak van die Twin Peaks-model, kritiek daarteen en die ervarings daarmee in Australië, Nederland en die Verenigde Koninkryk oorweeg. Die Suid-Afrikaanse Twin Peaks-model word hoofsaaklik deur die Financial Sector Regulation Act 9 van 2017 bewerkstellig. Hierdie wet vestig twee reguleerders ̶ die Voorsorgowerheid (reguleer die finansiële stabiliteit en welstand van finansiële instansies) en die Gedragsowerheid vir die Finansiële Sektor (reguleer die verbruikersbeskerming en markgedrag van finansiële instansies). Die wet stel duidelike oogmerke en funksies aan die reguleerders en ’n stabiliteitsmandaat vir die handhawing en herstel van finansiële stabiliteit aan die Suid-Afrikaanse Reserwebank. Finansiële stabiliteit word in die wet omskryf en gevolglik kan die verantwoordelike partye dienooreenkomstig aanspreeklik gehou word. Die uiteensetting van ’n stabiliteitsmandaat, die doel en funksies van reguleerders, die plig vir gekoördineerde samewerking tussen rolspelers ensovoorts, is in ander jurisdiksies as uitdagings vir die suksesvolle toepassing van die Twin Peaks-model geïdentifiseer. Hierdie uitdagings word in die Suid-Afrikaanse Twin Peaks-model aangeroer. Indien die Twin Peaks-model suksesvol toegepas kan word, sal dit waarskynlik tot ʼn meer stabiele Suid-Afrikaanse finansiële sektor bydra. Die mate van die bydrae sal egter van die sukses van die Twin Peaks-model afhang, welke sukses eers na verloop van tyd en behoorlike toetsing bepaal kan word.