Die reg op godsdiensbeoefening in openbare skole

Abstract

Die tema van hierdie studie is religieuse vryheid met 'n spesifieke fokus op godsdiensbeoefening in openbare skole. In hierdie studie word die bepalings van artikel 15(2) van die Grondwet ontleed om die impak daarvan op godsdiensbeoefening in openbare skole in Suid-Afrika te bepaal. Die wyse waarop daar met die vraagstuk gehandel word, is aan die hand van 'n literatuurstudie deur inligting te bestudeer wat wetgewing, regspraak en regswetenskaplike publikasies insluit. Die gevolgtrekking wat na afloop van die studie gemaak word is dat die bepalings van artikel 15(2) nie godsdiensbeoefening in openbare skole verhoed nie maar dat dit eerder voorsiening maak vir godsdiensbeoefening in openbare skole deur spesifieke riglyne daarvoor te stel. In die ontleding van hierdie riglyne word dit duidelik dat neutraliteit en sekularisme onvoldoende benaderings tot die hantering van godsdienspluraliteit in Suid-Afrika is. Hierdie studie maak 'n belangrike bydrae om die staatsreg beter te verstaan in terme van die rol wat dit speel in godsdiensbeoefening. Godsdiens en die uitlewing daarvan in die openbaar speel 'n belangrike rol in die sosiale welstand van persone. Godsdiens vorm kwesbare gemeenskappe wat beskerm moet word. Die howe het egter tot dusver nog nie duidelik afleibare riglyne ontwikkel oor hoe religieuse vryheid en godsdiensbeoefening in Suid-Afrika en spesifiek openbare skole hanteer moet word nie. Die doel van hierdie studie is om verder lig op hierdie tema, en veral die vertolking van artikel 15(2) van die Grondwet, te werp. Religieuse kwessies is 'n hoogs sensitiewe asook aktuele aangeleentheid wat besondere aandag vereis.